【MK果實能力者】
Ringo：平成幪面超人嘅完結？
喺8月25號嘅朝早，平成最後一個幪面超人—時王嘅TV版正式完結。我未睇時王最新嘅劇場版，而透過朋友嘅劇透，我大槪都了解到時王電影版嘅故事係講啲乜嘢。而連接TV版最尾嘅Geiz外傳亦都喺最近有新消息，但我哋就暫時未知道Geiz 外傳嘅故仔係會大概講啲咩嘢。
如果你問我，直至目前一刻，我對於平成最一個拉打嘅完結有咩感想嘅話，我諗除咗個嬲字，我都無咩嘢可以答到你。十年前Decade嘅出現，令我同埋身邊嘅拉打迷朋友都激動咗一下。
因為我見到一個打通咁多個舊平成拉打世界嘅機會，特別係共同世界以及共同世界觀嘅出現，我相信亦都令唔少嘅拉打迷都對Decade充滿期待。
不過好可惜嘅係，Decade只係一個用嚟拖時間嘅計劃，草草了事。
經歷咗新平成9拉打之後，我哋喺Build嘅結尾，我哋再一次見到融合世界嘅槪念出現，官方亦都證實原本獨立於新平成8子嘅Build亦都係喺同一個世界觀入面。之前2018年嘅時候，可以變做前輩拉打嘅Zi-O嘅出現再次令到我哋激動咗一下。故事設定容許，拉打嘅設定容許，我哋會唔會有機會呢？有冇可能見到一個做得好嘅共同世界呢？呢個係我一直以嚟都不斷希望會見到嘅場面。
最後個結果係咩呢？係無啊！
睇咗頭兩集之後，觀眾望住Zi-O嘅Build篇睇撚到搲撚哂頭。甚至到最後白倉親口承認Zi-O嘅世界又係一個獨立嘅世界觀，亦姐係話故事設定上拉打世界之間係無共通，舊有角色嘅回歸都只係俾你爽下，搵得返佐藤健同其他主演返嚟都只係為咗你哋爽，下咁嘅姐。
係，我係睇得爽，係睇到好感動嘅，但係呢一切一切都唔係為咗完善成個故事格局嘅時候，咁又有咩意思呢？ 睇時王嘅時候，頭十幾集都有一個補完嘅小劇場，大概都係用嚟玩下梗，吐下糟，但我估唔到嘅係我睇時王睇得最開心嘅就係睇下製作組自己嘅吐糟。吐製作人糟、吐大人嘅理由糟、吐自己都亂咗嘅設定糟、吐兩個前輩一齊去咗拍死神所以回歸唔到糟等等諸如此類嘅吐糟，但問題嘅重點係經過咗十年，東映又或者係白倉都重係未學識好好咁去計劃，一心只係想賣玩具賣玩具，結果就係整咗一大堆出得果幾集嘅過渡性設定、形態之類，重要自己拖自己後腿。依家埋唔到尾仲同你哋講「啊，你哋自己返去諗啦」咁樣。
好啦咁喺另一個方向諗，缺乏計劃嘅東映，嚟到新平成尾段係唔係無牌喺手可以俾佢運用，去整理返個共同世界呢？
咁就當然唔係啦！
W、OOO、Fourze都有影嘅財團X呢？隔離城市嘅設定呢？Zi-O穿越時間同空間（係啊，空間啊）嘅設定呢？好啦，你搵埋Decade返嚟啦，用Decade去做啲嘢得唔得呢？點解明明有咁多張好牌，東映同白倉都總係要一張都唔上不特止，重要炸爛哂佢哋呢？
因此當你睇到時王最後一集嘅時候，新舊平成拉打嘅世界已經融合到得返時王同埋月讀嘅世界。
莊吾話：「唔好睇少騎士嘅歷史」。
最後放棄稱霸之路嘅莊吾問老咗嘅自己，逢魔時王嘅力量係唔係單單只係破壞嘅力量呢？呢個時候老咗嘅莊吾就話，要創造，就一定要有破壞。老咗嘅莊吾係破壞嗰個，莊吾就決定要做創造嗰個，重新改寫歷史。之後我哋就見到痴埋咗嘅世界，分咗做二十一個世界。咁究竟呢二十一個世界會係邊啲拉打嘅世界呢？
Kuuga, Agito, Ryuki, Faiz, Blade, Hibiki, Kaubto, Den-O, Kiva, Decade
W, OOO, Fourze, Wizard, Gaim, Drive, Ghost, EX-AID, Build, Zi-O
扣返無自己世界嘅Decade，一共係十九個世界，姐係就會多咗兩個。而如果我哋計埋Decade嘅話就多咗一個世界，但係同時又會食咗Decade嘅設定。跟住最後嘅畫面就接咗去相信係Geiz特別篇嘅世界，最後嘅畫面除咗著校服跑步嘅Ola，最重要嘅就只有喺最後出現Zero One嘅拉打錶。
無錯，喺2019年9月1號嘅時候我哋就迎接咗新一代嘅拉打，暫時咁睇，第一集的確係做得唔錯。唔知跟住嚟跟嘅十年，我哋又會唔會可以見到拉打系列係真正咁向前走，係真正咁有所進步呢？
（本欄逢周六更新。敬希讀者垂注）
Search